وكان “الترامواي” نقلة حضارية في ربوع مصر

العصر الحديث عصر النهضة المصري
شارك التدوينة مع اصحابك بكل الحب..!
  • 36
  •  
  •  
  •  
  •  
  •  
  •  
  •  
  •  
    36
    Shares

في يوم 12 اغسطس عام 1896، تقريبا ماكانش حد من سكان القاهرة قاعد في بيته!.. كانوا اغلب الناس في الشارع، رجالة وستات واطفال وشباب.. كله واقف بيتابع من اول حي بولاق لغاية ميدان الرميلة (القلعة) مرورا بميدان العتبة الخضراء.. عشان يتفرجوا على الأختراع الغريب العجيب اللي بيمشي على قضبان حديد في قلب الشوارع!.. كان صوته مزعج جدا، واللي بيشوفه بيتخض من منظره للوهلة الأولى، والعيال الصغيرة بتجري في كل مكان وتقول: “العفريت!.. العفريييت!!..”

كان ايه العفريت دا؟.. تعالوا نشوف..

حقيقة “العفريت” دا انه كان اول عربية ترام تشق طريقها في شوارع القاهرة، كانت الشركة البلجيكية اللي رسي عليها العطا بتاع الحكومة المصرية بتعمل رحلات تجريبية على اول خط تم تركيبه، وتم تسيير العربيات دي بالكهرباء واللي كانت ابتدت تنتشر في بيوت وشوارع القاهرة. وكان بيركب في اول عربية تمشي، معالي حسين فخري باشا ناظر (أو وزير) الأشغال العامة وهوا كله فخر واعجاب بالأختراع الجديد، وكان معاه كبار موظفين الأشغال ومندوب الشركة البلجيكية و 3 صحفيين من جريدتي “المقطم” و”الأهرام”.. وتاني يوم كان المانشيت في جرنان “المقطم” بيقول:

الترامواي في شوارع القاهرة

“شهدت العاصمة امس مشهدا قلما يشهد مثله أهل المشرق، ولم يخصر على قلب بشر منذ اعوام قلائل، وهو أن تجري مركبات كبيرة تقل مئات الناس لا بقوة الخيل ولا بقوة البخار بل بقوة الطبيعة التي تسبب البروق، هذا هو الترامواي الكهربائي.. تسرع المركبة حتى تسابق الريح متى خلت لها الطريق، وتارة تسير رويدا رويدا، أو تقف بغتة عند اعتراض الأولاد السابلة طريقها. وقد وقف سائقها ووضع على ميزان تسييرها وايقافها، ويصل بينها وبين السلك فوقها عمود من الحديد لأتمام الدورة الكهربائية.. وقد تقرر ان يحظر ركوبه على كل محدث ضوضاء أو غوغاء أو سكران أو مصاب بعاهة تشمئز منها النفوس، ولا يجوز تسلق العواميد المعدة للحركة الكهربائية، او تعليق شيء عليها او اقامة اشارات كاذبة..”

4- Close-up of motorman of modern street car. 1942

وبعد أيام من التجربة، تم افتتاح تسيير الترام بصفة رسمية على 8 خطوط، كلها بتتجمع في ميدان العتبة وتصل أطراف المدينة في الوقت دا بالكامل.

images (6)

ونستخلص معلومات قيمة من دراسة اعدها الباحث محمد سيد كيلاني بعنوان “ترام القاهرة” يؤكد ان الترام قد كان كان نقلة كبيرة في تاريخ المجتمع القاهري. تدرج فيه من طور البداوة المتمثل في استخدام الحمير والبغال الى طور المدنية الحديثة المتمثل في استخدام الكهرباء في وقت كانت المشكلة الكبرى في القاهرة هي الأنتقال من مكان لمكان.. كان الشعب كله بيركب الحناطير اللي كانوا بقوا شبه مافيا بتستغل الناس وتتحكم فيهم.. كمان ماكانش سكان الأحياء البعيدة زي مصر الجديدة بيقدروا ينزلوا وسط البلد يسهروا او يشتغلوا ويرجعوا في نفس اليوم!.. فنقدر نقول ان حي مصر الجديدة هو الأبن الشرعي للترام لأنه منحه الحياة بعد الأنعزال، كمان بعد انشاء الترام حصلت طفرة كبيرة في جميع نواحي الحياة، وتم القضاء على العزلة تماما، وابتدا يبقا فيه كازينوهات وملاهي ومسارح الناس تسهر فيها في وسط البلد اللي كان حي جديد ايامها، كمان توسعت المدينة وازدهرت احياء جديدة بعد مالناس ابتدت تروح تسكن هناك زي العباسية مثلا ومصر الجديدة.. بدأت الروابط العائلية تسيب شوية بشوية ورقابة الأباء على الأبناء تقل لما تشجعوا الأبناء يروحوا لبعيد.

images (1)

كمان الترام ساعد على ازدياد واتساع الحركة التجارية، فظهرت المحلات الكبري في وسط البلد والعتبة، وابتدا الرأي العام يتشكل بين الناس بعد ما اتصلوا ببعض، وابتدا يبقا خطر على السراية وعلى الأحتلال!.. وكترت الأندية الثقافية والأجتماعية، وكمان انتشرت الصحف والمجلات وانعكس دا على الأدب بصورة او بأخرى.. بيقول شاعر اسمه إلياس حنيكاتي في رفضه لوجود الترام بالقاهرة:

إن الترامواي على القاهرة        مصـــيبة يا قومنــــا قاهرة

فكــم قلـوب هالــها رهـبـة          وكم نفوس غالها طاهرة

يجري وعزرائـــيل من خلفه             يمد للقبض يدا غادرة

فيا رجال الضبــط ماضبطكم             وأين الأعين الساهرة

واذا تتبعنا مشاهد افلام السينما القديمة نلاقي منها ان الترام اصبح مكان مثالي للقاءات العشاق بعيدا عن عيون الأهل والجيران، وبقا مكان مثالي للتحرش بالنساء لأنه سمح بالأختلاط بين الجنسين وساعد على كدا الزحام، وكمان بقا مرتع للنشالين والنصابين وطبعا كلنا فاكرين اللي باع الترام في ميدان رمسيس لأحد القرويين اللي نازلين من القطار في باب الحديد!.. ورغم ظهور السيارات والاوتوبيسات في بداية القرن العشرين لكن الترام مازال وسيلة المواصلات الشعبية والرخيصة، صديقة البيئة واللي بتمشي من غير عادم زي بقية المواصلات.

tramway-ticket

أما بقا في الأسكندرية فكان الموضوع مختلف شوية.. فالترام ظهر من قبل مايظهر في القاهرة بكتير اوي. ففي اغسطس عام 1860 منحت الحكومة المصرية تاجر انجليزي يهودي اسمه سير ادوارد سام فريمان حق امتياز انشاء خط للترام بيبدأ من عند مسلة كليوباترا (محطة الرمل حاليا) الى منزل الشيخ عتمان المغازي (محطة فلمنج)، وبدأت الشركة العمل اللي استمر 3 سنوات وتم الأفتتاح في يناير عام 1863 بقطار وحيد من 3 عربيات (درجة اولى ودرجة تانية ودرجة تالتة) عشان يشجعوا الناس تركب، وكان بيجره اربع خيول، والرحلة بتبقا في حوالي ساعتين بزمن بأربع مواعيد في اليوم: الساعة 8ص و12:30م و2:30م و 5:30م ورحلات العودة من فليمنج تبقا 9:30ص و4م. ومع تولي الخديوي اسماعيل حكم مصر ازداد عمران منطقة الرمل واتبنى فيها قصور كتير وتشجعت الشركة انها تستخدم اول قاطرة بتدور بالفحم في اغسطس من نفس العام.

tram fleming station

وفي عام 1897 انتهت اعمال ازدواج الخط بالكامل وتم مد خط تاني (او تفريعة) عشان يخدم محطة قطار سيدي جابر ويربطها بالمدينة، وتم مد خط جديد من فلمنج الى محطة المحمدية (فيكتوريا حاليا) ودي كانت نهاية العمران في اسكندرية. وفي العام التالي تم استبدال عربات البخار بقاطرات تسير بالكهربا، وتم استبدال كامل العربات في عام 1904 على النمط الكهربي الجديد في الوقت دا، وتم مد خط من محطة الرمل لسراي رأس التين في حي الأنفوشي بامتياز لشركة بلجيكية في 1897 وكانت الصراحة سبّاقة في دخول الكهرباء قبل شركة الخواجة الأنجليزي، وبدات في نفس الوقت بربط اجزاء المدينة القديمة زي محطة مصر وكرموز ومحرم بيه والمنشية بخط نهايته في محطة الرمل عشان يرتبط بخط ترام الرمل وبكدا ترابطت المدينة بالكامل.

تم الأحتفال بتسيير اول ترام كهربي في الأسكندرية عام 1897 بحضور الخديوي عباس ووزير الأشغال والخواجا دوجاه رئيس الشركة البلجيكية، وبيقول أحمد شفيق باشا في مذكراته عن اليوم دا:

«في 11 سبتمبر 1897 احتفل بافتتاح أول خط للترام بالإسكندرية، فاجتمع جمهور عظيم من الناس في شارع المنشية الصغرى مبدأ الخط الكهربائي، وأوقفت خمس عربات كهربائية لحمل المدعوين، وأعدت عربة مزينة بالأزهار لركوب الخديوي، وفي الساعة الخامسة حضر سموه فنزل وحي مستقبليه، وكان قد سبق سموه الغازي أحمد باشا مختار وكبار رجال المعية وحضرات النظار، بعد ذلك ركب الخديوي العربة المعدة له وسارت، وتلتها بقية العربات تقل المدعوين، إلى أن وصلنا إلى المكس، وبعد ذلك عدنا بها إلى المخزن العام بكرموز، حيث افتتح الخديوي المأدبة التي أقيمت هناك، وبعد ذلك عاد مع حاشيته إلى المنتزة».

AlexandriaTram1903

وابتدت مد خطوط الترام تأثر في عمران مدينة الأسكندرية واتجاهه، فبدا يزحف في اتجاه شريطي موازي للساحل، من راس التين الى فيكتوريا فظهرت احياء جديدة زي الشاطبي والأبراهيمية وسيدي جابر (في الوقت دا طبعا) وظهرت كمان نوادي اجتماعية وثقافية تخدم اسكندرية كلها (نادي سبورتنج).

وفي عام 1912 تم دمج الشركتين بعد تنازل الشركة البلجيكية لشركة الخواجة الأنجليزي عن الأسهم والممتلكات، وبقت شركة واحدة بتمتلك كل العربات وتشغل الخط كله..

وكان اغلب سواقين الترام في كل العربات من الطلاينة، والكمسارية من المالطيين، وكان زمن التقاطر كل ساعة تقريبا والتذكرة بدأت بمليمين مع بداية الخط في 1863، الى ان اصبحت 5 مليم بعد عام 1929 لكامل الخط. وكانت مضرب المثل في الأنضباط في المواعيد بحيث يقدر يعتمد عليها الراكب اكبر من اي وسيلة مواصلات تانية.

وبعد اعقاب عام 1952 تم تأميم شركة ترام مدينة الأسكندرية، وحلّوا المصريين محل الطلاينة والمالطيين، وتعاقب على الشركة 5 اجيال في العربات من البلجيكي للمجري للدنماركي (الترام الأزرق المميز للأسكندرية) للياباني (الترام الأصفر)، وتمت تطوير بعض العربات وعمل (ترام كافيه) للنزهة في 2013 وبعدين تم الغاءها بعد ما اثارت جدل على مواقع التواصل الأجتماعي.

تتطلب عرض الشرائح هذه للجافا سكريبت.

ودلوقتي وبعد اكتر من 100 سنة من تسيير خطوط الترام، مع الأسف مافيش فيها اي تطوير برغم امتداد عمران الأسكندرية بعد فيكتوريا بكتير، بل تم إلغاء خطوط عديدة من المنشية لمحطة مصر وكرموز وباب 10 بدعوى زحمة الشوارع.. ورغم ان الترام ماعادش زي الأول في جودة الخدمة او الأنضباط في المواعيد، مازال بيستخدمه اغلب سكان اسكندرية في تنقلاتهم وبالذات طلبة المدارس ومجمع الكليات النظرية.

لطفا لو عجبتك التدوينة تبقا تشيرها لأصدقائك عشان تعم الفائدة وماتنساش تتابع المدونة ليصلك كل جديد وتتابع حساب تويتر اللي تحت.. وشكرا

مصادر:

  • محمد سيد كيلاني – ترام القاهرة دراسة تاريخية اجتماعية أدبية.
  • جمال بدوي – مصر من نافذة التاريخ.
  • ويكيبيديا الموسوعة الحرة.
  • بوابة محافظة الأسكندرية.

شارك التدوينة مع اصحابك بكل الحب..!
  • 36
  •  
  •  
  •  
  •  
  •  
  •  
  •  
  •  
    36
    Shares
  •  
    36
    Shares
  • 36
  •  
  •  
  •  
  •  
  •  

9 thoughts on “وكان “الترامواي” نقلة حضارية في ربوع مصر

  1. انا من سكان الاسكندرية وطبعا بشكركم جدا على هذا العمل الرائع واحب اقول بس ان ترام كافيه ماتلغيتش دا في 3 تورمايات كافيه و في كمان جاردن كافية في الطابق الثاني من عربه من عربات ترام الرمل وليمون كافيه بردو في الطابق الثاني من عربه من عربات ترام الرمل

شاركنا برأيك فيما قرأت!..