الفسطاط.. أول حاضرة للعرب في إفريقية

مصر الأسلامية
شارك التدوينة مع اصحابك بكل الحب..!
  •  
  •  
  •  
  •  
  •  
  •  
  •  
  •  
  •  

بعد دخول القائد عمرو بن العاص لمدينة الأسكندرية بعد خروج آخر جندي بيزنطي منها في سبتمبر 642م (للمزيد اقرأ هنا)، عجبته جدا شوارعها ومبانيها وقال: تلك منازل قد كفيناها!.. يعني مساكن جاهزة اهيه.. نسكن على طول!.. لكن بعد ما كتب لأمير المؤمنين عمر بن الخطاب اللي في المدينة قال له انه عايز مدينة مايفصلوش عنها بحر ولا نهر في اي شهر من شهور السنة، لو حب ييجي في اي وقت يركب راحلته ماقيش حاجة تقف قدامه.. فاختار القائد عمرو مكان على الضفة الشرقية للنيل جنوب المقطم بتحده الصحراء من جهة الشرق، وقريب من مدينة بابليون القديمة وقريب كمان من ساحل النيل لسهولة ارتباطها ببقية البلاد، وكان اول من سكنها جنود الجيش من عرب قبيلتي غافق وعك في سنة 21 هـ.. وسموها فسطاط مصر.. أو مدينة مصر.

Ancient_Alexandria_(1878)_-_TIMEA

وتقريبا كان اختيار الموقع عند بداية تفرع النيل جنوب الدلتا، وقريب من “كالزيما” على رأس البحر الأحمر وغرب صحراء سيناء. ودا مش جديد لأن دا كان موقع استراتيجي قديم اختاروه ملوك الدول السالفة وقامت فيه عواصم كتير زي “منف” و “أون” و “بابليون” وغيرها، وموضعها كان فضاءً ومزارع بين النيل والجبل الشرقي مافيهوش اي مباني غير حصن بابليون اللي كان بيطل على النيل من بابه الغربي، واستفادت الفسطاط من موقعها على النيل اللي يسّر للأهالي الحصول على الماء من جهة، وخدم توسعها العمراني من جهة ثانية، عن طريق التحكم في طرق المواصلات التجارية الداخلية والخارجية بين مصر والشام، وبين مصر والحجاز وكان موقع بارد ليلا دافئ نهارا، والمطر مش بينزل الا نادرا زي اغلب مدن مصر ماعدا اسكندرية والساحل.

وبنى القائد عمرو في المدينة الجديدة مسجد كبير لأداء الصلوات، بيقول المرؤخين انه كان على مساحة تقريبا ثلث مساحة المسجد الحالي، وكان بالأجر(الطوب المحروق) مع الحجر واستخدموا فيه اعمدة رخامية من معابد وقصور بطلمية او رومانية قديمة لازالت اغلبها موجودة لغاية النهاردا، وكمان دار للإمارة عشان يسكن فيها ويحكم منها البلاد، وبنى دار للخليفة عمر بن الخطاب عشان تكون مقر للضيافة، وكتب يقول له، فرفض الخليفة وطلب انها تكون سوق لعموم المسلمين فسماها دار البركة.

مسجد عمرو بن العاص

وازداد تحكم الفسطاط في مسارات التجارة بعد الأمر باعادة حفر قناة سيزوستريس القديمة بين النيل والبحر الأحمر وسماها عمرو بن العاص خليج أمير المؤمنين، وكان مدخلها شمال مدينة الفسطاط عند منطقة فم الخليج الحالية. وازداد العمران في مدينة الفسطاط مع مرور الوقت وجاء الناس فيها من كل مكان عشان تبيع منتجات بلادها فتوسعت الأسواق وحركة التجارة، وبيقول المؤرخ ابن عساكر في وصفه لمبانيها وشوارعا ان هناك من بنى بيوت كانت 3 او 4 طوابق، وتراوحت اتساع شوارعها من اثني عشر ذراعا (حوالي 7 م) الى ثلاثة اذرعة (يعني 1.7 م) يادوب يسمح بمرور راكب الدابة!.. وكانت اسماء الشوارع والحارات (زي مابيقول د. جمال الدين الشيال في تاريخ مصر الأسلامية) بأسماء القبائل العربية اللي ساكنة فيه، فمثلا كانت الخطط (أو الحارات) كالتالي (نقلا عن تاريخ مصر الأسلامية ج1 ص50 – د. جمال الشيال):

  • خطة مهرة وفيها سكان من قبيلة حِميَر.
  • خطة تجيب وفيها من قبيلة كِندة
  • خطة اللفيف وكان فيها من الأُزد وغسان وبني شجاعة.
  • خطط اهل الظاهر، وفيها قبائل عربية وفدت عليها من الإسكندرية بعد بناء الفسطاط وتسكين القبائل بها.
  • خطط الصدف وهم من بطون كندة.
  • خطط خولان وفيها من بني خولان.
  • خطط الفرس وفيها من وفدوا من الفرس اللي اسلموا وجاءوا مع جبش عمرو.
  • خطط تحصب وهو حي من احياء اليمن.
  • خطط الحمراوات الثلاث وهي من الروم اللي أسلموا وجاءوا مع جيش عمرو من الشام.

ومن بعد عمرو بن العاص سكنها ولاة بني أمية ، فأمر مروان بن الحكم ببناء دار جديدة للأمارة سماها (الدار البيضاء) وكانت حصن وسكن في نفس الوقت، ولما دخل العباسيين مصر أمر القائد العباسي صالح بن علي اللي كان والي مصر ببناء مدينة جديدة شمال الفسطاط لسكن الجند ورفض بناء الناس فيها، وسماها مدينة العسكر، وبعد فترة سمحوا ببناء الناس فيها فاعتمرت الساحة الكبيرة بين العسكر والفسطاط واتصلت ببعضها، ودا كان اتساع عمراني للمدينة مع الزمن. ولما جاء الأمير أحمد بن طولون وامر ببناء مدينة القطائع شمال مدينة العسكر، فبنى ترسانة للسفن امام مدينة الفسطاط، ومع الزمن دخلت من ضمن النطاق العمراني للمدينة.

وظلت الفسطاط عاصمة تجارية وادارية لمصر لأكثر من 400 عام حتى دخول المعز لدين الله الفاطمي لمصر وأمره ببناء مدينة القاهرة، ولما عمل سور محيط بالمدينة كانت الفسطاط خارج السور لكنها مافقدتش قيمتها كمنطقة تجارية هامة لغاية حريق الفسطاط بأمر من الوزير شاور في اواخر العهد الفاطمي (هانتكلم في الموضوع دا بالتفصيل فتابعونا) فصارت مدينة الفسطاط خرابة مدمرة لفترة طويلة جدا وظلت اثار الحريق واضحة على أطلال جدران المدينة لغاية العصر الحديث لما حصل التمدد العمراني ودخلت في نطاق محافظة القاهرة.

CairoFustatHouses.jpg

ومن اشهر معالم الفسطاط في العصر الحالي واللي مازالت باقية طبعا جامع عمرو واللي تم توسعته واعادة بناؤه في العصر المملوكي والعثماني، وحصن بابليون واللي مازال باقي بعض ابراجه، والكنيسة المعلقة واللي تم بناءها قبل بناء مدينة الفسطاط نفسها في عهد الأمبراطور تراجان.

لطفا لو عجبتك التدوينة تشيرها لزملاءك وماتنساش تتابعنا على حساب تويتر اللي ظاهر تحت على اليمين.. شكرا.

مراجع:

  • د. جمال الدين الشيال – تاريخ مصر الأسلامية ج1.
  • حسن نويصر – الأثار الأسلامية.
  • ويكيبيديا الموسوعة الحرة.

شارك التدوينة مع اصحابك بكل الحب..!
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

0 thoughts on “الفسطاط.. أول حاضرة للعرب في إفريقية

شاركنا برأيك فيما قرأت!..